Sunday, April 22, 2018

Zgjedhjet e reja parlamentare në Republikën e Kosovës, janë të domosdoshme!

IMG_2098.jpeg

Shkruan: Nehat Hyseni 


Raporti i Progresit i këtij viti, ashtu siç ishte testi i PISA-s i vitit të kaluar për të arriturat në lëminë e arsimi, realisht ishte një pasqyrë e të arriturave të gjithëmbarëshme të Republikës së Kosovës në fushat e arsimit, gjyqësisë, shëndetësisë, luftës kundër krimit të organizuar dhe korrupsionit, demokracisë, mirëqeverisjes, etj. 

Për fat të keq, në të gjitha këto lëmi, Raporti i Progresit i Unionit Europian konstatoi ngecje, mosavancim, madje edhe kthim prapa.

Kurse, Shqipëria dhe Maqedonia u shpërblyen për të arriturat e tyre, me marrjen e ftesës për fillimin e negociatave rreth plotësimit të kushteve për anëtarsim në BE.

Askush nuk ka mundur ta merr me mend se Republika e Kosovës nëntëmbëdhjetë vjet pas çlirimit nga Serbia dhe dhjetë vjet pas shpalljes së pavarësisë do të mbetet i vetmi shtet në Europë, populli të cilit është i izoluar si në karantinë, që mbahet jashtë mundësisë së udhëtimit pa viza nëpër Europë, thuajse bëhet fjalë për një pjesë të infektuar apo të kontaminuar, që mund ta rrezikoj apo kontaminoj Europën.

Republika e Kosovës, pra, ka arritur deri në atë derexhe, sa që konsiderohet rrezik për Europën!

Kush është fajtor për këtë katandisje, për faqe të zezë, të Republikës së Kosovës?

Natyrisht se pak a shumë, fajtorë jemi të gjithë ne. 

Por, dorën në zemër, fajtorë kryesorë për këtë gjendje të turpëshme në të cilën është degraduar e zezuar ky vend i bekuar, është “meritokracia” aktuale, që është duke e qeverisur Republikën e Kosovës në bazë të “meritave të luftës”. Pas zgjedhjeve të qershorit të vitit të kaluar, Kosovës iu kompletua “triumvirati i çlirimtarëve”, Thaçi-Haradinaj-Veseli, që realisht paraqesin garniturën më të padenjë dhe më të rrezikëshme të këtij vendi, që Republikën e Kosovës do ta largojnë nga të gjitha rrjedhat civilizuese dhe nga proceset demokratike euro-atlantike. 

Ata, Republikën e Kosovës do ta zhysin deri në fyt në krim e korrupsion, meqë e konsiderojnë atë si “plaçkë lufte”, duke pretenduar se ata e çliruan këtë vend dhe u vetshpallën si “çlirimtarë”.

Sipas logjikës se ata e dëbuan Serbinë nga Kosova dhe gjithçka në këtë vend u takon atyre, duke filluar nga pasuria dhe pronat mbi të gjitha asetet publike e private e këtij vendi, e deri te liria dhe të drejtat njerëzore të qytetarëve të saj.

Kështu, busolla apo orientimi i qeverisjes së tyre u distancua dhe u largua e u ndaj nga koncepti euro-atlantik i qeverisjes, duke vendosur “Murin kinez”, si vi ndarëse dhe refuzuese të parimeve themelore të demokracisë së mirëfilltë europiane. Qeverisja e këtij “triumvirati” të “krahut të luftës” është karakteristik për qeverisjet mafioze Latinoamerikane, si psh Bolivia, Çile, Peru, etj. që janë të ngulfatura nga krimi e korrupsioni dhe ligjin e bëjnë atje bandat mafioze që kontrollojnë vendin.

Prandaj, Republikës së Kosovës duhet t’i ndihmohet për të dalur nga ky qorrsokak, duke iu kthyer asaj një qeverisje e re, që udhëhiqet sipas parimeve dhe vlerave të demokracisë euro-atlantike, që do ta çoj këtë vend

drejtë integrimeve të mirëfillta, në familjen e shteteve dhe popujve me demokraci të avancuar dhe me standarde të larta të mirëqenies popullore dhe lirive e të drejtave të garantuara të të gjithë qytetarve të saj.

Prandaj, zgjedhjet e reja parlamentare në Republikën e Kosovës janë të domosdoshme dhe çdo ditë e qeverisjes aktuale, realisht paraqet kohë të humbur dhe kthim prapa e regres të këtij vendi të bekuar.

Friday, April 20, 2018

Banaliteti, injoranca dhe krimi, si “normalitet”


IMG_2098.jpeg

Shkruan: Nehat Hyseni 


Kosova është bërë “nëna e vakive”, ku nga goja e pushtetmbajtësve aktualë gjithçka mund të dëgjosh e përjetosh, si në cirk të hapur e të pafund. 

Gjithçka në qeverisjen e Republikës së Kosovës është kthyer mbrapsht dhe injoranca, arroganca, banaliteti e krimi janë kthyer, si me magji, në “normalitet”!

Gjatë vitit 2017 kishim dy palë zgjedhje në Kosovë, zgjedhjet e jashtëzakonëshme parlamentare në qershor dhe zgjedhjet lokale në vjeshtë.

Rezultati i zgjedhjeve të jashtëzakonëshme parlamentare nuk prodhoi mazhorancë qeverisëse të shqiptarve në Republikën e Kosovës. 

Prandaj, u zvarrit gjatë kohë procesi i formimit të Qeverisë dhe konstituimi i mazhorancës qeverisëse aktuale.

Për herë të parë në historinë e pas luftës u formua Qeveria nga “krahu i luftës”, me minorancën shqiptare, të ndihmuar nga koalicioni i partive serbe të dirigjuara  e të kontrolluara nga Beogradi, Lista Srpska, e cila pas intervenimit të Policisë së Kosovës dhe arrestimit të Marko Gjuriqit në Mitrovicën veriore, deklaroi se doli nga ky koalicion qeverisës.

Kështu, tani e tutje Kosova ka mbetur që të qeveriset nga pakica dhe po paralajmërohen zgjedhjet e reja parlamentare.

Por, kjo Qeveri, e formuar në shtatorin e vitit 2017, nga PDK, AAK, Nisma dhe Lista Srpska, në krye me kryeministrin Haradinaj, apo “Rambon” e Kosovës, do të mbahet në mend gjatë kohë për udhëheqjen skandaloze dhe abuzimin me pushtetin, Kushtetutën dhe ligjet deri në ekstrem.

Meqë pretendohej pushteti më çdo kusht nga të vetëquajturit “çlirimtarët”, si dhe posti i kryeministrit nga Ramush Haradinaj, Republikës së Kosovës iu parapërgatit skenari më i padenjë dhe i turpshëm i qeverisjes me shtetin në mënyrë skajshmërisht abuzive e kriminale, e cila të gjitha sukseset e arritira deri më tani, i ka rrezikuar tmerrësisht.

Madje edhe njohjet e pavarësisë së Kosovës, jo vetëm që kanë ngecur, por ato kanë filluar edhe të zvogëlohen, duke u mohuar njohjet parreshtur nga shtetet e caktuara. Diplomacia kosovare është duke shënuar disfatë nga diplomacia agresive e antishqiptare e Serbisë.

Morali politik i liderëve aktualë ka degraduar në përmasa brengosëse dhe është rrezikuar seriozisht ardhmëria e këtij vendi. 

Ramush Haradinaj erdhi në pushtet me kauzën për mbrojtjen e Demarkacionit të kufirit me Malin e Zi, që sipas tij do duhej të përfshinte edhe Kullën e Çakorrin, por sapo erdhi në pushtet ai dështoi në mënyrë katastrofale dhe “harroi” se çfarë kishte thënë e premtuar derisa ishte në opozitë.

Aktualisht, në kreun e qeverisjes shtetërore në Republikën e Kosovës janë ngatërruar gjërat deri në atë masë sa që nuk duhet se cilat janë përgjegjësit e secilit institucion dhe lider të kreut të shtetit.

Presidenti dhe kryeparlamentari përzihen në kompetencat e kryeministrit dhe të Qeverisë deri në ekstrem. As ministrat nuk i binden kryeministrit dhe as që e informojnë atë, por secili prej tyre i bindet kryetarit të partisë së vet.

Prandaj, kjo qeverisje aktuale i përmgjanë një orkestri të prishur e të shthurur dhe të pakoordinuar, që prodhojnë një kakofoni politike që rrezikon vlerat elementare të demokracisë dhe ardhmërinë e vendit. 

Kryeministri dhe partitë e koalicionit aktual qeverisës, më këmbëngulje mbrojnë shkeljen e ligjit, duke u arsyetuar shumë skellje kriminale, si psh armëmbajtjen pa leje dhe keqpërdorimin e tyre në dasma e ahengje, si gjëra që duhet toleruar, meqë na qenkan pjesë e traditës tonë kombëtare?!

Kryeministri Haradinaj, në një emision televiziv shkon edhe më larg dhe deklaron se pirja e rakisë na qenka gjithashtu pjesë e traditës tonë kombëtare. Prandaj edhe deri sa ishte në opozitë, krahas gazit lotësjellës. Ai me dorë të vet kishte futur në Parlament shishen e rakisë, që ia ofronte deputetëve të tjerë.

Ndërkaq, kryeministri Haradinaj nuk hezitoi që t’i merr në mbrojtje ministrat kriminel, që gjuajnë me armë në ahengje dhe rrezikojnë jetën e njerëzve, duke u arsyetuar paturpësisht para popullit se ky është adet i yni, që e paskemi traditë, paçka se shkilet ligji dhe nga kjo traditë e mbrapësht kanë humbur jetë njerëzish, kurse rasti i fundit i vrasjes së djalit 14 vjeçar nga pakujdesia e injoranca e xhaxhait të tij dhe ahengun e dasmës e shndërron në tragjedi familjare, etj.



Saturday, April 14, 2018

Mynxyra antishqiptare në Luginën e Preshevës


IMG_2098.jpeg

Shkruan: Nehat Hyseni 


Pesëvjetori i nënshkrimit të Marrëveshjes midis Hashim Thaçit e Ivica Daçiqit, me ndërmjetësimin e Komisioneres së lartë të BE-së, baroneshës Catherine Ashton, më 19 prill 2013 në Bruksel, Serbia triumfoi me instalimin e vasalëve të saj, dmth mynxyrës antishqiptare në udhëheqjen e pushtetit lokal të komunës së Preshevës.

Të ballafaquar me sfida e probleme të panumërta të përditshmërisë sonë të zymtë, ne shqiptarët e Luginës së Preshevës, si edhe të gjithë shqiptarët kudo që janë, gjithënjë jetojmë me shpresë se “do të bëhet më mirë”.

Shpresa po na mbanë gjallë edhe këto ditë të herëshme pranverore, kur kanë filluar pemët të lulëzojnë, lulet të çelin e natyra të gjelbërohet.

Edhe cicërima e zogjëve ka marrë hov gjithandej, me këngën e tyre të këndëshme pranverore, të cilën ka filluar pak si shpeshë ta “shoqëroj” zhurma shurdhuese e avionëve ushtarak të Serbisë mbi qiellin e Preshevës, me fluturimet e tyre tejet të ulëta, thuajse i prekin pullazet e shtëpive dhe ia fusin frikën e trishtimim deri në palcë edhe foshnjave në djep.

Kryetari i sapozgjedhur të Komunës së Preshevës, Shqiprim Arifin, i cili njihet si mik i afërt i Vuçiqit dhe partisë së tij SNS-it, që kontribuoi shumë për ngjitje në pushtet këtij në zgjedhjet e parakohëshme lokale të 24 dhjetorit 2017.

Ky kontribut i Serbisë për “kryetarin tonë”,  ishte domethënës dhe kuptimplotë, sidomos gjatë fushatës parazgjedhore, duke ia mundësuar Shqiprim Arifit, si “njeri i mirë” (lexo: “shqiptar I ndershëm”- “pošteni albanac”), një fond mbi tre milion euro për arritjen e “fitores së merituar”. 

Komuna e Preshevës, gjatë tërë kohës së fushatës ishte shndërruar në kantier ndërtimi dhe gumëzhinte nga makineritë, duke vendosur shtylla, kubëza e pllaka betoni kudo që mendohej se mund të sillte vota me asfalt mbi baltë e ara, në panikun e Presidentit të Serbisë, Aleksandar Vuçiqit, për ta konvertuar kryetarin e dhunshëm, dmth Shqiprimin, në “kryetar të zgjedhur”.

 Prandaj, Serbia nuk kurseu para dhe mund në këtë punë “patriotike”, për ta bërë këtë “njeri të mirë” të Vuçiqit, kryetar të Komunës së Preshevës.

 Natyrisht se personi apo “njeriu i mirë” për Serbinë, s’ka mundësi që të mos jetë “i mirë” edhe për shqiptarët. 

Sepse, ai “zbuloi” se “fajin për prapambetje dhe moszhvillim të Luginës së Preshevës, nuk e ka Serbia, por se fajin e kanë shqiptarët”!

Prandaj, duhej larguar nga skena politike politikbërja “e dështuar 27 vjeçare e PVD dhe PDSH-së”- bërtiste me sa fuqi që kishte Shqiprim Arifi gjatë fushatës parazgjedhore, i shoqëruar me zhurmën e makinerisë me turbo-investimet e Serbisë së atyre ditëve me shtylla e kubëza betoni, e çka jo tjetër, duke i shtruar e rregulluar madje edhe oborret e shtëpive dhe duke dhënë “pare me thes” për ta blerë votën e lirë të qytetarëve. 

Kështu, u harxhuan gjatë atyre ditëve mbi tre milionë euro dhe APN fitoi gjithsej 15 këshilltarë, nga 38 këshilltarë të Kuvendit Komunal të Preshevës.

Ky ishte një zhgënjim i madh për padronin e tyre, Presidentin e Serbisë Aleksandar Vuçiqin, sepse dështuan në pretendimet e tyre megalomane, që sipas deklarimeve të Shqiprim Arifit, pretendonin dyfishin e atyre votave dhe një mazhorancë që do t’ia kalonte “partive të vjetra” shqiptare të kësaj komune.

Pra, “hesapi i shpisë” me atë të “çarshisë”, nuk i doli as Shqipërimit e as Aleksandrit (Vuçiqit). 

Sepse, për një këshillëtar komunal të APN-së u paguan hiç më pak se 200 mijë euro!

Por ama, pushtetin lokal e mori duke e futur në Kuvend “listën serbe “Aleksandar Vuçiq” pas një dekade, kësaj radhe edhe me votën e shqiptarve.

 Por, as kjo nuk i mjaftoi!

Prandaj, mbështetjen e gjetën tek fraksioni i PDSH-së së Ragmi Mustafës, tek Sami Salihu-LRPDSH, i cili për qëllime dhe ambicie të sëmura karrieriste, iu bashkëngjit kësaj mynxyre të turpëshme e antishqiptare.

Pastaj, në lojë u fut për efekte të fushatës edhe një firmë private nga Kosova, e cila kishte fituar dhe realizuar kohë më parë tendera për policinë dhe ushtrinë e Serbisë. 

Kurse, gjatë fushatës u inskenua kinse “prerja e shiritit” dhe inaugurimi i kësaj fabrike në lokalet e fabrikës së dikurëshme “ÇIK”, me pajisjen komplet për prodhim, si në “bahçe të babës”.

Skenari spektakular rreth kësaj firme “patriotike” nga Kosova, që po përgatitet për tenderat e premtuar edhe për ushtrinë e Rusisë së Putinit. 

Prandaj, ne preshevarët dhe kosovarët do të mburremi me çizmet, këpucët dhe me mbathjet e tjera të Policisë dhe ushtrisë së Serbisë dhe të Rusisë: “made in Kosova”, apo “made in Presheva”! 

Kurse, kryetari aktual i komunës së Preshevës, Shqiprim Arifi është shndërruar në zëdhënës të devotshëm të Qeverisë së Serbisë dhe Presidentit Aleksandar Vuçiq dhe me shumë entuziazëm “sqaron” degradimin e shërbimeve komunale dhe transferimin e tyre menjëherë pas konstituimit të legjislaturës së re të Kuvendit Komunal të Preshevës, në seancën konstituive të 19 shkurtit 2018, në Bujanoc, siç ishte rasti me Shërbimin e kadastrit dhe me Shërbimin Tatimor.

Zhurma e makinerive ndërtimore përfundoi me mbyjen e fushatës dhe mbajtjen e zgjedhjeve, por u zëvendësua me fluturimet e avionëve ushtarak që kanë krijuar atmosferë të tmerrëshme dhe trishtuese të luftës.

Natyrisht se kjo nuk i mjaftoi Shqiprim Arifit, i cili fluturimet e shpeshëta të avionëve ushtarak të Serbisë, të ulëta dhe trishtuese mbi pullazet e shtëpive, i arsyeton si “normale” dhe si stërvitje apo manovra të rregullta ushtarake, e jo si reagim nervoz e frustrues të etablishmentit aktual politik e ushtarak të Serbisë ndaj arrestimit dhe dëbimit poshtrues të Marko Gjuriqit nga Policia elitare ROSU, në Republikën e Kosovës.

Meqë Serbia nuk ka mundësi që t’i dërgoj avionët dhe ushtrinë e vet në Kosovë, ajo shfryhet në Preshevë, duke treguar fytyrën e vërtetë antishqiptare e anticivilizuese në synimin e saj për nxitjen e shpërnguljes dhe ekzodit edhe më të madh të shqiptarve dhe spastrimin etnik të Luginës së Preshevës.

Për këtë mision të saj makabër, Serbia e ka parapërgatitur terrenin politik, meqë ka Instaluar vasalët e vet në pushtetin lokal dhe për çdo veprim antishqiptar të pushtetit serb, kryetari aktual Shqiprim Arifi dhe Sami Salihu, si zëdhënës të Vuçiqit, dalin dhe arsyetojnë veprimet kriminale të pushtetit të Serbisë dhe akuzojnë shqiptarët.

E gjithë kjo po ndodhë në mënyrë të papenguar pikërisht në kohën kur Presidenti Vuçiq, me t’u kthyer nga takimi me Kancelaren e Gjermanisë, zonjën Angela Merkel, deklaron se “ky vit është vit i vendimeve të mëdha dhe të dhimbëshme për zgjidhjen e problemit të Kosovës”.

 Prandaj, Serbia ka parapërgatitur terrenin politik në Luginë, me instalimin e vasalëve të saj besnikë e servilë në komunën e Preshevës dhe është duke investuar shuma marramendëse edhe në komunën e Bujanocit për të parapërgatitur mynxyrën finale antishqiptare e anticivilizuese në këtë pjesë të gjeografisë kombëtare të shqiptarve në Ballkanin Perëndimor.


Thursday, April 12, 2018

“Padronët” e rrezikshëm të Republikës së Kosovës


IMG_2110.jpeg


Shkruan: Nehat Hyseni 


“Çdo e keqe ka dhe një të mirë mbrapa, kurse çdo përpjetëz ka dhe një teposhtëz”.

Kështu thotë fjala e urtë popullore, që ne e përdorim shpeshë në jetën e përditëshme. 

Sidomos në rastet kur kemi nevojë dhe domosdoshmëri për ta ngushëlluar veten për fatkeqësitë që (s)mund t’i parandalojmë.

Prandaj, edhe tani kur ka arritur kulmin e keqja në (keq) qeverisjen e Republikës së Kosovës me “triumviratin”: Thaçi-Haradinaj-Veseli, ku rregullat e demokracisë dhe civilizimit jo vetëm që shkilen, përdhosen e nuk përfillen deri në ekstrem, por ata, për hirë të së vërtetës, as që kanë idenë elementare lidhur me to.

 Pra, kjo bandë gangsterësh na është imponuar në krye të shtetit, meqë sipas tyre, ata na e paskan “çliruar” Kosovën. Rrjedhimisht, ata edhe kanë fituar të drejtën për të disponuar me Republikën e Kosovës si “pronarë” apo “padronë” të saj!

Kjo i bie se Kosova na qenka “pronë” e tyre, dmth se gjithçka në këtë vend të bekuar është “plaçkë lufte” e tyre: të gjitha pasuritë e asetet publike e private brenda territorit të Republikës së Kosovës.

Si i tillë, ky shtet është shndërruar në pasuri dhe pronë private të oligarkisë së re, që lindi pas dëbimit të Serbisë nga territori i Republikës së Kosovës në vitin 1999. 

Ndërkaq, i tërë populli (i shkretë) i këtij shteti më të t’i në Europë, është “rob lufte” i kësaj klase politike e ekonomike të “çlirimtarve”, të cilët me dëbimin e Serbisë nga Kosova, me automatizëm e zunë vendin e saj, si “padronë” të rinjë të Republikës së Kosovës dhe popullit të saj. 

Sipas kësaj logjike, ata mund të veprojnë si të dojnë me këtë “pronë” të tyre dhe askush nuk ka të drejtë që t’i mbetet hatri, siç thotë kryeparlamentari aktual, Kadri Veseli, nuk kanë të drejtë të kundërshtojnë e të bëjnë “ciu, ciu...”!

Ata munden që të vijnë natën, Ditën apo kurëdoqoftë, t’i arrestojnë e dëbojnë qytetarët e huaj dhe t’i dëbojnë sa herë të dojnë, pa kurrëfarë ligji dhe të drejte vendore apo ndërkombëtare këdo, si në mesjetë. Sepse, ashtu janë marrë vesh “padronët” e këtij shteti të mjerë me Erdoganin, apo edhe më këto tjetër në ruzullin tokësor.

Kuptohet se, “kryepadroni” është vet Presidenti, si Kreu i këtij shteti privat, i cili më bashkëpronarin biznesmen, Ministrin e Punëve të Jashtëme, Behgjet Pacollin, së pari e hedhin gurin dhe mëshifen si “struci”, pa e informuar dhe pa e pyetur fare kryeministrin dhe as partnerët tanë strategjikë mdërkombëtarë, duke e kthyer kompasin politik kah lindja bizantine, përkundrejt orientimit tonë strategjik pro-perëndimor e euro-atlantik.

Pastaj, mëshifen dhe, siç thoshte dikur lideri komunist Fadil Hoxha, futen në “birë të miut” dhe nuk guxojnë ta pranojnë përgjegjësinë dhe fajësinë për poshtërsinë dhe pafytyrësinë politike e njerëzore të tyre dhe deklarojnë se “nuk duhet” së kush urdhëroi dëbimin banditesk e mafioz të gjashtë shtetasve të Turqisë, pesë profesorëve të Kolegjit turk “Mehmet Akif” dhe një mjeku. 

Pafytyrësia e Presidentit është edhe më e madhe, meqë edhe djali i tij ka kryer shkollimin në këtë kolegj dhe i ka njohur fare mirë mësimdhënësit që i dëbuan, meqë paraprakisht i shpallën si “terroristë dhe persona që rrezikojnë serozisht sigurinë e Republikës së Kosovës”! (Sic!) 

Pa kurrëfarë procedure civilizuese e pa kurrëfarë vendimi gjyqësor?!

Si në kohën e Sllobodan Millosheviqit që veprohej ndaj intelektualëve, veprimtarëve e patriotëve shqiptarë!

Hajde “padronë”, hajde!

Mashallah!

Meqë edhe katër fëmijtë i mi e kanë kryer të gjithë më sukses këtë kolegj, natyrisht se edhe unë i kam njohur personalisht shumicën e profesorëve të dëbuar dhe me bindje dhe sinqeritet të plotë mund të deklaroj se asnjëherë nuk kam dëgjuar për ndonjë aktivitet të dyshimtë, e aq më pak “terrorist”, gjatë gjithë kohës së mësimit të fëmijëve të mi në këtë kolegj.

 Përkundrazi, unë si prind kam mbetur shumë i kënaqur dhe ndihem fatlum e krenar për faktin se janë edukuar dhe kanë kryer mësimet në këtë institucion arsimor dhe ndihem fajtor dhe i turpëruar, por edhe i trishtuar nga ky akt banditesk i shtetit ndaj tyre.

Dorëheqjet e ministrit të PB dhe drejtorit të AKI-së, paraqesin akt cinik e qyqarë, meqë fajtorët e vërtetë gjënden në paprekur dhe bëjnë edhe më tutje planifikime të tilla antishtetërore e anticivilizuese, duke rrezikuar dhe dëmtuar rëndë imazhin dhe orientimin euro-atlantik e properëndimor të Republikës së Kosovës.

Shpresojmë se ju akt i dëmshëm dhe komprometues i kreut politik të vendit ka arritur kulmin dhe se shpallja e zgjedhjeve të jashtëzakonëshme parlamentare është e pashmangëshme, për të sjellur në mënyrë demokratike një qeversje të re dhe të përgjegjëshme, besnike dhe të sinqertë në orientimin euroatlantik e properëndimor, siç thoshte Presidenti Historik, Dr.Ibrahim Rugova, “në miqësi të përherëshme me SHBA dhe me miqtë tanë ndërkombëtarë”.